Mетрополитан урлагийн музей Буддын сүмээс алдагдсан үзмэрийг Өмнөд Солонгос руу буцаажээ
Солонгосын дайны үеэр алдагдсан зургийг сүмд нь албан ёсоор буцаан өгсөн байна
АНУ-ын Нью Йорк хотын Метрополитен урлагийн музей цуглуулгад нь хадгалагдаж байсан 18-р зууны үеийн Буддын шашны холбогдолтой хуйлмал зургийг БНСУ-д буцааж өгчээ.
Тамын арав дахь хаан (1798) нэртэй зургийг энэ оны 11-р сард Гангвон мужийн Сокчо дахь Синхеунса сүмд нь эргүүлэн өгсөн байна. Тус бүтээлийг АНУ-ын арми Солонгосын дайны үеэр сүмийг эзэлж авах үед хууль бусаар авсан гэж үздэг.
Уг зураг нь газар доорх ертөнцийн арван хааныг дүрсэлсэн цуврал зургийн нэг хэсэг бөгөөд өдгөө гурав нь гадаадад хадгалагдаж байна. Солонгос дахь Сокчогийн соёлын өвийг эргүүлэн авах хороо цуврал зураг эргээд нэг дор цуглана хэмээн найдаж буйгаа илэрхийлжээ.
Сөүл хотноо болсон үзмэрийг албан ёсоор хүлээлгэн өгөх арга хэмжээнд Метрополитан урлагийн музейн захирал Макс Холлейн, Солонгосын өвийн үйлчилгээний администратор Хэо Мин, Хилийн чанад дахь Солонгосын соёлын өвийн сангийн ерөнхий нарийн бичгийн дарга Квак Чан Ён, Сокчо хотын дарга Ли Бён Сон; Сокчогийн соёлын өвийг эргүүлэн авах хорооны дарга Ли Санг Рае болон Синхеунса сүмийн ахлах лам Жи Хэ нар оролцжээ.
Солонгосын соёлын өвийн албаны администратор Хэо Мин: "Энэ хэрэг бол төр, хувийн хэвшлийн нягт хамтын ажиллагаагаар чухал үр дүнд хүргэсэн гайхалтай жишээ боллоо" гэж мэдэгджээ.
Метрополитен урлагийн музей нь Соёлын Өмчийн Санаачилга төслийн хүрээнд сүүлийн хэдэн жилийн хугацаанд хэд хэдэн үзмэрийг эх оронд нь буцаагаад байгаа билээ. Үүнээс дурдахад 2021-2022 онд Непал улс руу 11-р болон 13-р зууны үеийн хоёр баримал, 2023 онд Грек, Турк улс руу арав гаруй үзмэр, 2024 онд Ирак улс руу эртний Шумерын нэг үзмэр зэрэг үзмэрүүдийг хууль ёсны дагуу буцаагаад байгаа билээ.
Соёлын Өмчийн Санаачлагаа төслийг хүрээнд цуглуулга дахь үзмэрийн гарал үүслийн судлах судлаачдын тоог хоёр дахин нэмэгдүүлснээр Метрополитен урлагийн музейн хууль бусаар худалдагдсан үзмэрийг эзэнд нь эргүүлэн өгөх хүчин чармайлт эрчимжиж байна.
Met одоо эргүүлэн өгсөн үзмэрийн талаарх мэдээллийг тусгахын тулд үзмэр тус бүрийн цахим хуудсыг шинэчилж байгаа аж.
